காதலின் காதலி
காதலில் இருந்து உதிரும்
ஒற்றை சிறகு
என் மடி தேடி அலையும்
அதன் பாதையெங்கும்
பயணிக்கச்சொல்லி
என் பாதங்களைப்பற்றும்..!
காதலின் இசைக்கருவி
இதயம்தான் என்று..
காதுக்குள் பாடும்..!
காதலின் பூக்கள்
என் தோட்டத்துக்கு ஏங்கும்..!
காதல்
அதன் தேசமெங்கும்
காற்றினில் என்னைச்சுமந்தபடி
உலா வரும்.!
காதல் வானத்தில்
நிலா என்றில்லை
என் நகம் மட்டும்தான்.!
காதல்
கண்ணீர் பருகும்
பறவை இனம் என்ற
இரகசியம் நான் அறிந்ததால்
காதல் தேவதையாக மட்டுமே
நான் இருக்கிறேன் அதன் தேசத்தில்.!
காதலின்
காதலி
நான்.!