பெரும்பாவம்

விளை நிலத்தில்
விழுகின்ற வியர்வைத்துளிகள்
விளக்கேற்றி வைக்காமல்
வேதனை பட வைத்ததும்

வெள்ளத்தில் அழிந்த பயிரால்
உள்ளத்தில் விளைந்த சோகத்தை
இறக்கிவைத்து ஆறுதல் கூறாமல்
விழிகள் கண்ணீர் வடித்ததும்

மேகம் பொழிந்த மழையால்
மண்ணு செழித்தாலும்
மனித வியர்வையும் காரணமென்பதை
மக்கள் நினைக்க மறந்ததும்

பார்த்து வியக்கும் படைப்பெல்லாம்
பூமியில் வாழும் மனிதர்கள்
சிந்திய வியர்வைத்துளிகளால்
சாதித்ததென எண்ணாததும்

பூவாசமும், உணவின் சுவையும்
புரிந்துகொள்கிற நமக்கு
உழைப்பவரின் வியர்வைதரும் வலியை
உணராதது பெரும்பாவம்