ஒரு காலைப்பொழுது -கங்கைமணி

அரும்பு மலர்வதுபோல் -ஒரு
காலைப்பொழுது.
கிழக்கு திசை.
வெளிச்ச ஊற்று.
என் எண்ணம் வளர்வதுபோல் -மெல்ல
வண்ணம் வளர்கிறது.

காலை வரைபடம்
காணக்கிடக்கிறது
காணுமிடமெல்லாம்
கவிதை வழிகிறது.

பசுமை போர்வையில்
பனிமணிகள்
சிதறிக்கிடக்கிறது.
தோரணமாய்
பனித்துளிகள்
எங்கும் தெரிகிறது.

நெளிந்த நிலவுகள்
வாசலில் வருகிறது.
வரைந்த கோலங்கள்
நேசமாய் அழைக்கிறது.

பறவைகளின் பாக்கள் -கேட்டு
பருகி முடிக்காத..,
பனித்துளிகளோடு,
மயங்கிவிழும் பூக்கள்.

திறந்துகிடக்கும் தெருக்கள், தன்னில்
ஒற்றைக்கால் முளைத்து
ஓடும் பல பூக்கள்.

சோலைச் சேலைகள்
சூரியக் கரம்பட்டு
மெல்ல அவிழ..,

ஓடும் ஓடை
அவிழ்ந்த ஆடையை
அள்ளிச்செல்ல.

மறைந்து தென்றல்
மகிழ்ந்து பார்த்து
வியந்து மெல்ல
நடந்து., சோலை
தேகம் தீண்ட.

சிலிர்த்த மலர்கள்
சிவந்து மலர்ந்து..
உதிரும் அழகினில்,
உணர்வுகள் உறைய-என்
உள்ளம் பறந்து
இவ்வுலகைக் கடக்குதே!.
இயற்கையின் கைகளில்
எனையளிக் கொடுக்குதே!.
-கங்கைமணி