மழை

இரவின் கனத்தமழை
அதிகாலை வாசலை விட்டுச் செல்கிறது
ஒரு கிழிந்த போர்வை

சலனமில்லாமல் நீர்; நகர்கிறது
மரக்கிளைவிட்டு ஒன்றும் அடிவிட்டு ஒன்றுமாய்
இருநிலவுகள்

இடியுடன் மேகம்
சத்தமிட்டு வருகிறது
ஒலிபெருக்கியில் பாடல்

தீமிதி திருவிழா
இறங்கி வருகிறது
வானில் மின்னல்

வானில் மின்னல்
வந்து மறைகிறது
ஒரு பூச்செடி

தரையிறங்கிய மின்னல்
பற்றி எரிகிறது
தீச்சட்டி

தொடர்ச்சியாய் மின்னல்
அணைந்து வருகிறது
தெருவிளக்கு

பலத்த காற்றும் மின்னலும்
சத்தமிட தொடங்குகிறது
காலி நீர்க்குடுவை

- கி. கவியரசன்


Close (X)

11 (3.7)
  

மேலே