பேருந்து நிலையம்

அந்தி சூரியனின்
அலங்கார விரிப்புகளால்
அழகு சேர்க்கும் வானம்
அதை சிதைப்பதுபோல்
வண்ணப் பொலிவிழந்து
வாடி நிற்கும் பேருந்து நிலையம்

குண்டும் குழியுமாய்
சுற்றியுள்ள சாலைகள்
சுகமற்றுக் கிடக்கக்
குலுங்கிக் குலுங்கி
அழுதுபோகும்
புராதன பேருந்துகள்

சுகமற்ற சாலைக்கு
மருந்து கொடுக்க எண்ணி
மேகம் தந்த மழையால்
பக்கவிளைவாகி
வழுக்கி விழுந்து, காயப்பட்டு
வேதனைபட்டதும் பயணிகளே!

பயணம் சிறக்க
பகவானை வேண்டி—உண்டியலில்
காசு போடும் பயணிகள்
சோற்றுக்கு வழியின்றி
தவிக்கும் ஏழைகளைக்
கண்டு கொள்ளாதது முறையோ?

எப்போதும்போல்
மாறாத பண்போடு
சாலைகள்,பேருந்துகள்,
பேருந்து நிலையங்கள்—மாறிவிட்டார்கள்
பயணிகள் மட்டும், தினமும்
செத்து செத்து பிழைப்பதால்.