சைக்கிள் பையனும் ஒரு காதலும்

அன்று அமர்ந்து பேசியது
உதிரம் குடித்த
விஷபுற்கள் மீது போலும்.
நமது பிரிவு என்பது
அங்கு தொடங்கியது.
வழக்கமான காரணங்களே...
அம்மா,அப்பா..
மணமுடிக்கா அக்கா...
மனமோ மூடக்குளவியாய்
சுற்றி அலைந்தது
காதல் நினைவுகளில்...
ஓய்வின்றி உரைத்தாய்
பிரிதலின் நியாயத்தில்
புரிதலை உருவாக்க...
உன் வாக்கியங்கள்
எங்குமே முற்றுப்பெறவில்லை
முட்டி மோதியும்
குழம்பி தெறித்தும்
விழுந்து எழுந்து
உடைந்து உடைந்து
நொறுங்கி கொண்டிருந்தது
சைக்கிள் பழகும் சிறுவனோடு.
உன் எந்தப்பார்வைக்கும்
அர்த்தம் தெரியாத எனக்கு
இனி என்ன என கேட்கும்
இந்தப்பார்வையை
புரிந்து கொண்டேன்.
சைக்கிள் பையன் போக
நீயும் செல்கிறாய்.
உன் பின்னே வருகிறது
என் காதல்
வழி தவறிய கோழிக்குஞ்சாய்...