முத்தமிழ்

எத்திக்கும் நற்புகழ் ஈட்டித் தருமென்றும்
தித்திக்கு முள்ளத்தில் தீந்தமிழாம் - முத்தமிழே
வித்தாகும் நந்தமிழர் வெற்றிக்குப் பாரினில்
அத்தனைக்கும் மூத்ததுவே யாம் .

கத்துங் கடல்தவழ் காற்றாய்க் குளிர்வித்து
நித்தம் புதிதாய் நிறைவளிக்கும்! - முத்தமிழே
பித்தந் தெளிவித்துப் பீடுறச் செய்திடும்
புத்தி புகட்டும் பொலிந்து .

பத்தரை மாற்றுப் பசும்பொன்னாய் மிக்கொளிர்ந்து
முத்திரை யும்பதிக்கும் மூவினமாய் ! - முத்தமிழே
இத்தரணி வெல்லும் இயலிசை நாடகமாய்
எத்துணை யின்ப மிது?

புத்தம் புதுமலராய்ப் பூரிக்க வைத்திடும்
ஒத்தட மாகும் உளவலிக்கு ! - முத்தமிழே
பத்தி நெறிபுகட்டிப் பக்குவமுந் தந்திடும்
சொத்தாய் விளங்குஞ் சுகம் .

முத்துத் தமிழர் முயற்சியில் ஆர்வர்டில்
மெத்தவளர்ந் தின்னும் மிளிர்ந்திடும் ! - முத்தமிழே
மொத்தத்தில் மேன்மை மொழியாக என்றென்றும்
சித்த மினிக்கச் செயும்.

சியாமளா ராஜசேகர்