கொரோனா6

கொரோனா(6)

=========================================ருத்ரா


குண்டுகள் வீசாமல்

சித்தாந்தங்களைக்கொண்டு

மோதிக்கொள்ளாமல்

ஒரு மூன்றாம் உலகப்போர்

முற்றிக்கொண்டிருக்கிறது.

தொற்றிக்கொண்டிருக்கும்

கண்ணுக்குத் தெரியாத‌

அந்த நுண்ணுயிரி

உலக வளமையை சிதைக்கும்

புண்ணுயிரியாய்

இந்த மண்ணையே

தின்று தீர்க்கத்துடிக்கிறது.

எவன் சொல்லிக்கொடுத்தானோ

இந்த அசுரனுக்கு

பிராணாயாமத்தை?

நம் நுரையீரல்களில்

பத்மாசனம் போட்டுக்கொண்டு

நம் சரித்திரத்தையெல்லாம்

சவப்பெட்டிக்குள் அடைக்கப்பார்க்கிறான்

அவன்.

பங்கு மார்க்கெட்டில்

இந்த பூகோளத்தையே

பெரும் லாபங்களின்

வரைபடமாய் காட்டிக்கொண்டிருந்த‌

நம் தாறு மாறான பொருளாதாரம்

தடம் புரண்டு அல்லவா கிடக்கிறது.

நம்மோடு

ஹைடு அண்ட் சீக் விளையாடும்

அந்த அரக்கச்சிறுவனுக்குப் பயந்து

நம் வீடுகளில் நாம்

சௌகரியமான இருட்டு மூலைகள்

தேடி அல்லவா ஒளிந்து கொண்டிருக்கிறோம்.

கொரோனா எனும் பெயர்

பொன்னெழுத்துக்களில் பொறிக்கப்பட்டு விட்டது.

அது இறுமாப்போடு சொல்கிறது.

உங்கள் சுவாசங்களை நிறுத்தி வைத்து

அந்த குண்டலினியின் அணுகுண்டு ஆற்றலை

என்னோடு சோதித்துப்பாருங்கள் என்று!

எங்கோ ஒரு நாட்டில்

"ஓம்"என்று கூட

சிகிச்சை செய்து பார்ப்பதாய்

தொலைக்காட்சிகள் காட்டுகின்றனவே.

எங்கே போனது நம் ஜெனடிக் இஞ்சினியரிங் திறமைகள்?

நாம்

நம் ஆய்வுக்கூடங்களில்

இந்த வைரஸ்களைக்கொண்டு

வினாடிக்கு பில்லியன் டாலர்களை

லாபமாக மாற்ற முடியுமா?

என்று தான்

நம் விஞ்ஞானங்களையெல்லாம்

கொட்டிக்கவிழ்த்துக்கொண்டிருக்கிறோம்.

அதில் ஒன்று

நம்மையே விழுங்கி

மொத்த வியாபாரம் செய்ய வந்து விட்டது!

இந்த அவலத்தைப்பாருங்கள்!

செவ்வாய்க்கோளில்

பாறைகளை சுரண்டி சுரங்கம்

வைக்கலாமா என்று

நம் தொழில் நுட்பம்

எங்கோ ஒரு உயரத்துக்கு

சென்ற பின்பும்

"நமக்குத் தேவையான முக கவசங்களைக்கூட"

நம்மால் உற்பத்தி செய்ய முடியாமல் அல்லவா

வீழ்ந்து கிடக்கிறோம்.

"யுரேனஸ் நெப்ட்யூன்" களின்

முதுகை சொறிந்து விட்டு

அவற்றின் முகங்களை எதிர் நோக்கும்

நமக்கு

"டெஸ்ட் கிட்டு"கள் கூட ஒரு

எட்டாத தூரம் ஆகி விட்டது!

நம் பரிணாம உயர்ச்சிக்குள்

எப்படி இப்படி ஒரு வீழ்ச்சி?

சமூக நேயத்தை கழற்றி வைத்து விட்டு

எந்த விஞ்ஞானமும்

இங்கே சுவாசிக்க முடியாது

என்பதை

அதோ "லக லக லக.." என்று

வலிப்புக்காட்டி சிரித்து

சொல்லிக்கொண்டு

ஓடுகிறதே அந்த கொரோனா!

இது தான்

இந்த மூன்றாம் உலகப்போரின்

கனமான தொரு மைல் கல்.

இதுவே

நம் மீது விழுந்துகொண்டிருக்கும்

ஒரு விண்கல்.


================================================