காத்துண்பான் காணான் பிணி - சிறுபஞ்ச மூலம் 7
நேரிசை வெண்பா
பற்றினான் பற்றற்றா னூறவசி; யெப்பொருளும்
முற்றினான் ஆகும் முதல்வனூற் - பற்றினாற்
பாத்துண்பான் பார்ப்பான்; பழியுணர்வான் சான்றவன்;
காத்துண்பான் காணான் பிணி 7
- சிறுபஞ்ச மூலம்
பொருளுரை:
எல்லாப் பொருள்களிலுங் கலந்து நின்றே அவற்றிற் சார்பில்லாதவனாகிய கடவுளாற் செய்யப்பட்ட முதனூலை கடைப்பிடித்து ஒழுகுகின்றவன் வீடு பேற்றை விரும்பி நோற்பவனாவான்;
எல்லாப் பொருளையும் முற்றவுணர்ந்தவன் எல்லார்க்குந் தலைவனாவான்;
நூல்களிற் கூறப்பட்ட அறங்களைக் கைக்கொள்வதனால், தன் மனைக்கு வரும் விருந்தினர் முதலியவர்களை யுண்பித்துத் தானும் உண்கின்றவன் அந்தணனாவான்;
பழிக்கு ஏதுவான செயல்களை அறிந்து விலக்குவோன் அறிவா னிறைந்த பெரியோனாவான்;
உடற்கு பொருந்தாத உணவுகளை மறுத்து உண்பவன் நோய் கொள்ளான்.
கருத்துரை:
பற்றற்றான் - தொடர்பற்றவனாகிய முழுமுதற் கடவுள்;
பற்றற்றான் நூல் என்பது இறைவன் ஓதிய வீட்டு நூல்.
எப்பொருளையும் உணர்ந்தவன் பலரையும் நல்லாற்றுப்படுத்துந் திறனுடையனாகவே அவனை யாவருந் தலைமகனாகக் கொண்டு போற்றுவார் என்பார், ‘எப்பொருளும் முற்றினானாகு முதல்வன்’, என்றார்.
பழியை யறிந்து நீக்குவோன் எல்லாராலும் பாராட்டப்படுஞ் சிறப்புடையவனாதலிற் சான்றோன் எனப்பட்டான்.