தர்மபுரி! தர்மத்தின் கொலைக்களமா?

தர்மம் புரிந்தவர்தம்
தாய் வீடு என்றிருந்தோம்
தர்மபுரி!
தர்மத்தின் கொலைகளம் அயிற்றே!
அது எப்படி.?

காதல் பறவைகளை
வேட்டையாட
வட்டமிடும்
சாதிக் கழுகுகளின்
சல்லாப மண்டபமா
தர்மபுரி?

ஒய்யார கொண்டைக்குள்
ஒழுகும் வக்கிரங்கள்.

சாதீய சாக்காடின்
சவக்குழி காவலர்கள்
மூளைச் சிரங்கு முற்றியதால்
ஊருக்கே தீ வைத்து
ஒப்பாரி விளைவிக்கும்
சிப்பாய்கள் ஆனார்கள்.

கலப்பு திருமணங்கள் என்ன
கலவரத்தின் சின்னங்களா?

அட!
இரட்டை குவளை
அவலத்தை மாற்றி
ஒற்றை குலம் உருவாக்க
கற்றுத்தரும் பாடம்
இதுவன்றோ?

இதயங்கள் கலந்த பின்னே
இமயம் ஒரு தடைக்கல்லா?

கலகம் பிறக்குமென்றும்
கண்ணீர் சுரக்குமென்றும்
யூகம் தெரிந்த பின்னும்
ஊமையாய் இருந்திட்ட
காவல் துறை என்ன
மௌனத்தின் பிம்பங்களா?

உடனே
காதல் துறை ஒன்றை
கண்டிப்பாய் உருவாக்குவோம்.

புதுமைச் சட்டங்கள்
செய்கின்ற முறையெல்லாம்
அவர்தம் கரங்களிலே
ஒப்படைப்போம்.

கல் மனம் சலவை செய்யும்
கலை ஒன்றை கண்டடைவோம்.

அதுவரை
காதல் பறவைகளின் கூட்டுக்கு
கருப்பு பூனை படை
காவல் தர ஆணை செய்வோம்.

யுகம் அறியா
சுகமென்று சுமக்கின்ற
சாதி முள்முடியை
எரியும் பெருநெருப்பில்
இன்றே சுட்டெரிப்போம்.

இந்த அழுக்கு யூகம்
முடிந்ததென்று
அறிவிப்பு செய்திடுவோம்.