உதவிடும் பூக்கள் ....
விடிவதற்கே முன்னரே மலரும் பூக்கள்
விடிந்ததும் உதவிடும் உலகுக்கு பலவழியில் !
மலர்ந்த முகம் இருந்தாலும் மகளிர்க்கு
பூச்சரம் தேவை நாளும் சூடிக்கொள்ள !
ஆலயம் செல்லும் ஆத்திக வாதிகளுக்கு
அவசியம் தேவை அர்ச்சனை செய்திட !
அர்ச்சகரும் செய்வார் அங்குள்ள சிற்பத்தை
அலங்காரம் என்று பலவித பூக்களால் !
திருமணத் தம்பதிக்கு நிச்சயம் தேவை
வண்ண மலர்களால் மணக்கும் மாலையாய் !
சுபநிகழ்விற்குச் செல்லும் சுற்றமும் நட்பும்
வாழ்த்திட வழங்கும் வண்ணமிகு பூங்கொத்தாய் !
அரசியல் மேடைகளில் முழங்கிடும் முகங்களுக்கு
அணிந்திட அணிவகுப்பர் பலர் பூமாலையுடன் !
மறைந்த மனிதர்க்கு மரியாதை செலுத்திட
மனவருந்தி வைப்பர் மலர் வளையங்களை !
இறந்தவரின் உடல்மேல் கண்ணீர்ப் பூக்களாய்
இறுதி ஊர்வலத்தில் தூவிடும் மலர்களாய் !
உருமாறி உதவிடும் பூக்களும் பூமியில் !
உதவாமல் உதறிடும் உள்ளங்களும் உலகினில் !
பழனி குமார்
