இணைந்திடும் மனங்கள்
இருமனம் இணைந்திட திருமணம் செய்வர்
இருவேறு இனமானால் கலப்பு மணம் என்பர் !
இருவீட்டார் பேசி முடிப்பது செய்முறை
சாதி மதம் மாறாதது என்றும் நடைமுறை !
கண்கள் பேசி மனங்கள் ஒன்றிட்டால்
காதலும் மலர்ந்து சாதியும் மறைந்திடும் !
அறியா முகமுடன் அவசரக் காதல்
தெரியா முகவரியாய் புரியா ஆத்திசூடி !
கண்களும் மனங்களும் எடுக்கும் முடிவை
கணினிகள் எடுப்பது கலியுகச் சாதனை !
மாறிய முறையால் தேறிய காதல்
பாடிடும் சிலநாள் , வாடிடும் பலநாள் !
திரையில் பார்த்து காதலிக்கும் மனங்கள்
திசைகள் அறியாப் பாதையில் பயணங்கள் !
சோதிட மணங்களும் சோகத்தில் முடிகிறது
காதல் மணங்களும் கசந்துப் போகிறது !
வளமான வருங்காலம் இனிதே அமைவது
சிந்திக்கும் இளைஞரின் சீரிய முடிவில் !
பழனி குமார்