புதுமைப் பொங்கல் பொங்கிடுவோம் பாவலர் கருமலைத்தமிழாழன் பொங்கிடுவோம் பொங்கிடுவோம்...
புதுமைப் பொங்கல் பொங்கிடுவோம்
பாவலர் கருமலைத்தமிழாழன்
பொங்கிடுவோம் பொங்கிடுவோம்
புதுமைப்பொங்கல் பொங்கிடுவோம்
பாபருக்கும் இராமருக்கும்
பகைமையினை நீக்கியே
தூபமிடும் மதவெறியைத்
துரத்தித்தூர விரட்டியே -பொங்
இலஞ்சத்தை ஊழலினை
இல்லையென ஓட்டியே
நலதிட்ட பலன்களெல்லாம்
நலிந்தோர்கள் கைசேர்த்தே -பொங்
சாதிவெறி வன்முறையைச்
சாய்த்துமனம் ஒன்றாக்கியே
நீதிநெறி நேர்மையிலே
நிலைத்தநல வாழ்வாக்கியே -பொங்
சொல்லின்றி உழைப்பினிலே
செழிக்கின்ற வளமாக்கியே
நல்வழியில் அறிவியலால்
நாட்டுநிலை உயர்வாக்கியே -பொங்
செங்கரும்பு கதலியொடு
செந்நெல்லின் மணிகுவித்து
மங்கலமாய் மஞ்சளெழில்
மனையெல்லாம் திகழவைத்தே -பொங்
அன்பென்னும் தோரணத்தால்
அகமெல்லாம் அழகுசெய்து
முன்நின்று அனைவரையும்
முகம்மலர்ந்து வரவேற்றே --பொங்