தேர்தல் கவிஞர் இரா இரவி
தேர்தல் ! கவிஞர் இரா .இரவி !
மூட நம்பிக்கைகளில்
ஒன்றானது
தேர்தல் அறிக்கை !
பார்த்து எழுதுவதில் மாணவர்களை விஞ்சினர்
அரசியல்வாதிகள்
தேர்தல் அறிக்கை !
வென்றதும் வென்றவர்
முதலில் மறப்பது
தேர்தல் அறிக்கை !
வில்லாய் வளைப்போம் வானத்தை
கயிறாகத் திரிப்போம் மணலை
தேர்தல் அறிக்கை !
நிருபித்தனர்
வாய்ச்சொல் வீரர்கள் என்பதை
தேர்தல் அறிக்கை !
தேன் வந்து பாயுது காதினிலே
தேர்தல் அறிக்கை படிக்கையிலே
நடந்தால் நல்லது உண்மையிலே !
சட்டம் இயற்றுங்கள்
தேர்தல் அறிக்கை நிறைவேற்றாவிடில்
தண்டனை உறுதி என்று !
கோடையின் கொடுமையை விஞ்சியது
அரசியல்வாதிகளின் கொடுமை
தேர்தல் பிரச்சாரம் !
எல்லோரும் சொல்கின்றனர்
மதுவிலக்கு
எப்படி வந்தன மதுக்கடைகள் ?
விலகவில்லை
எந்த ஆட்சியிலும்
வறுமை இருட்டு !
அழிப்போம் என்று சொல்லி
நிரந்தமாக்கினர்
வறுமைக்கோடு !
சின்ன மீன் போட்டு
பெரிய மீன் பிடிப்பு
அரசியல் !
செய்யாதே செலவு ! தேர்தல் ஆணையம்
எவ்வளவு செய்வாய் செலவு ? கட்சி
குழப்பத்தில் வேட்பாளர் !
யாரைத்தான் நம்புவது
குழப்பத்தில் தவிப்பு
வாக்காளர் !
முகத்தில் கரி பூசி
ஏமாற்றுவதற்கு முன்னோட்டம்
விரலில் மை !
குடவோலைத் தேர்தலில்
குற்றவாளிகள் நிற்க முடியாதாம்
நடைமுறைப்படுத்துவோம் !
சரியாகவே சொன்னார்
சிந்தனைச்சிற்பி பெரியார்
அரசியல் பற்றி !
