நீ எனக்கு வேண்டும்

மலருக்கு வாசம் வேண்டும்
மீனுக்குப் புனல் வேண்டும்
தேனுக்குத் தித்திப்பு வேண்டும் - என்
தேவதையை நீ எனக்கு வேண்டும்.

வானுக்குக் கூர்மை வேண்டும்
யாழுக்கு இசை வேண்டும்
தோளுக்கு வீரம் வேண்டும் - அடி
தோகையே நீ எனக்கு வேண்டும்.

கடலுக்கு அலை வேண்டும்,
உடலுக்கு உயிர் வேண்டும்
உதவிக்குக் கரம் வேண்டும் - என்
உயிரே நீ எனக்கு வேண்டும்.

மயிலுக்கு தோகை வேண்டும்
குயிலுக்கு கவி வேண்டும்.
வெயிலுக்கு நிழல் வேண்டும் -அடி
வெண்ணிலவே நீ எனக்கு வேண்டும்.

நட்புக்குத் தோழன் வேண்டும்,
நாட்டிற்கு வளம் வேண்டும்,
காட்டிற்கு வேங்கை வேண்டும் - என்
கிளியே நீ எனக்கு வேண்டும்.

பெண்ணுக்கு அணி வேண்டும்
பாலுக்கு சுவை வேண்டும்
பாட்டுக்கு தாளம் வேண்டும் - அடி
பாவையே நீ எனக்கு வேண்டும்

தீபத்திற்கு ஒளி வேண்டும்
சிலம்பிற்கு இளங்கோ வேண்டும்
சபைக்குத் தமிழ் வேண்டும் - என்
சர்க்கரையே நீ எனக்கு வேண்டும்.