நான் செயற்கரிய செய்வது என
செய்ந்நன்றி கொன்ற மகற்கு
செழுமை வாழ்வு என்றுமில்லை
செந்நாப்புலவர் செப்பியதையே
செதுக்கிக் கொண்டேன் என்னில்
நான் செயற்கரிய செய்வதெல்லாம்
கைக்குலுக்கி பாராட்டியவரை மறந்தாலும்
கைதூக்கி விட்டவரை மறவாது இருப்பதே
ஏடெடுத்து என்னை செதுக்கி
ஏற்றம் பெற வைத்த ஏந்தல்களை
ஏழ்பிறப்பும் என்நினைவில் கொள்வதே
ஏழையெந்தன் வரம் என்பேன்
ஒளிவிளக்கு ஏற்றி வைத்த
ஓய்வின் ஆசிரியபெருந்தகைகளோடு
உள்ளன்போடு உளமாரப் பேசி
உதவிக்கரம் நீட்டுகின்றேன்
அந்நாளில் அவர்செய்த அறமதை
அனுதினமும் நினைவில் கொண்டு
ஆற்றாமை மாணவனின் அறிவுப்பசிக்கு
அன்போடு இயன்றதை அடியேனும் தருகிறேன்
வேரூண்ட நீரை விழுங்கிக்குடித்து
தலையாலே தருமன்றோ தென்னம்பிள்ளை
வேரூன்றி நான்நிற்க வித்திட்ட வேந்தர்களுக்கு
வேண்டியதைச் செய்துதரும் நானும் அவர்பிள்ளை
