மீண்டும் வானம்பாடி

எண்சீர்க் கழிநெடிலடி ஆசிரிய விருத்தம்

முதலாளித் துவமொழிந்து சமத்து வத்தின்
=முதுமொழிதான் வையமெலாம் நிறையு தற்கும்
நிதமேழை மக்களது உலையும் பொங்கி
=நித்திலம்போல் நல்வாழ்க்கை நிலைப்ப தற்கும்
மதயானை போல்வளர்ந்த ஊழல் பேய்தான்
=மண்ணிதையும் விட்டொழிந்து போவ தற்கும்
பதமாக இறக்கைகள் விரித்து மீண்டும்
=பாவலர்கை சேரவேண்டும் வானம் பாடி !

மனிதநேயம் பனைமரமாய் வளர்ந்து ஓங்கி
=மரியாதை மானிடருள் காண்ப தற்கும்
தனிமனித எண்ணத்தை போக்கி எங்கும்
=தமிழொளியை அண்டமெலாம் பாய்ச்சு தற்கும்
கனியொத்த தேன்கவிகள் நாளும் செய்து
=காலமெலாம் நிரந்தரமாய் இருப்ப தற்கும்
இனிதாகத் தானமைந்த வானம் பாடி
=இனிமீண்டும் பிறக்கவேண்டும் கானம் பாடி !

- விவேக்பாரதி