நற்குணமுடையோர் செய்யலாகாதன - ஆசாரக் கோவை 81

புழைக்கடைப்பு காரரசன் கோட்டி உரிமை
இவற்றுக்கண் செவ்வியார் நோக்காரே அவ்வத்
தொழிற்குரியர் அல்லா தவர். 81 ஆசாரக் கோவை

பொருளுரை:

அந்த அந்தக் குறிப்பிட்ட தொழிலுக்கு உரிமையுடையவர்
அல்லாதவராகிய நற்குணமுடையோர் ஒருவர் வீட்டின்
புழைக்கடை வழியாக அவர் வீட்டில் நுழைய மாட்டார்.

அரசன் கூத்து முதலியவற்றால் இன்புற்றுக் கூடியிருக்கும்
அவையிலும், மனைவியரோடு இருக்குமிடத்திலும் போய்ப்
பார்க்க மாட்டார்..

கருத்துரை:

வேறொருவர் வீட்டில் புழைக்கடை வாயிலாற் போதலும்,
அரசன் களியாட்டிடத்தும் அந்தப்புரத்திடத்தும் செல்லுதலும்
ஆன்றோர் செய்யலாகாது.

புழைக்கடை - துவாரத்தின் கடை, கோட்டி - கூட்டம்.
உரிமை - மனைவி

வீடுகளை இடையீடாக ஏற இடம் விட்டுக் கட்டுவது தமிழ்நாட்டு வழக்கம். இவ்விடையிடம் வீட்டுக்குப் புழைபோன்றது. அதன் கடை, புழைக்கடை;
இது ஆகுபெயராய் வீட்டின் பின்புறத்துள்ள நிலத்தைக் குறிப்பதாயிற்று.