விண்ணுலகம் போற்றும் வியந்து
கண்ணுக்குக் கண்ணாகக் காப்பவள் பெற்றவளே
பெண்ணவளின் அன்பே பெரும்பேறாம்! -உண்டோசொல்
மண்ணுலகில் தாய்க்கீடு? வையகமும் வாழ்த்திட
விண்ணுலகம் போற்றும் வியந்து .
கண்ணே கனிமொழியே கற்கண்டே தெள்ளமுதே
வெண்மதியும் தோற்றிடும் விந்தைநீ - வண்ணமிகு
பெண்ணே,நம் காதலைப் பேணிடும் பேரழகை
விண்ணுலகம் போற்றும் வியந்து .
கண்டாங்கிச் சேலைகட்டி கார்குழலில் பூச்சூடி
கண்களிலே மைதீட்டக் காண்போரின் - கண்படுமே!
வெண்சுடரும் எட்டி விழிவிரித்துப் பார்த்திட
விண்ணுலகம் போற்றும் வியந்து .
பண்பாடு காத்துப் பலகலைகள் போற்றிடுவார்
நுண்மையுடன் கற்றிடுவார் நூற்பாவும் !- பண்புடன்
எண்ணற்ற வித்தைகற்ற ஈடில்லாப் பாவலரை
விண்ணுலகம் போற்றும் வியந்து .
புண்பட்ட நெஞ்சைப் புரிந்துதவி செய்திடும்
நண்பனைப் போலுண்டோ நல்லுறவு? - மண்ணுலகில்
திண்ணிய உள்ளமுடன் சீராட்டும் நட்புதனை
விண்ணுலகம் போற்றும் வியந்து .
