இரா மரமுஞ் சேரார் - ஆசாரக்கோவை 13
இன்னிசை வெண்பா
நீருள் நிழற்புரிந்து நோக்கார் நிலமிராக்
கீறார் இராமரமுஞ் சேரார் இடரெனினும்
நீர்தொடா தெண்ணெ யுரையார் உரைத்தபின்
நீர்தொடார் நோக்கார் புலை! 13
- ஆசாரக்கோவை
பொருளுரை
நீரின்கண் தம் நிழலை விரும்பி பாரார், நிலத்தை இருந்து கீறமாட்டார், இரவில் ஒரு மரத்தின் கண்ணும் சேர்ந்திரார், நோய் கொண்டு இடர்ப்பட்டாராயினும் நீரைத் தொடாமலே எண்ணெயை உடம்பின்கண் தேயார், அவ்வெண்ணெய் தேய்த்த பின் தம் உடம்பின்மேல் நீரைத் தெளித்துக் கொள்ளாது புலையை தம் கண்ணால் நோக்கார்.
கருத்துரை:
தண்ணீரில் நிழல் பார்த்தல், சும்மா தரையைக் கீறுதல் முதலியன ஆகா.
நிழல் - உடம்பு நிழல்; தண்ணீரில் நிழலை நோக்குதல் செல்வக் கேடாதலின் ‘நீருள் நிழற்புரிந்து நோக்கார்' என்றார்! நிலத்திற் கீறுதல் தோற்றார் செய்யுங்குறி! மரங்கள் பகலில் உட்கொண்ட கெட்ட காற்றை இரவில் வெளி விடுவனவாதலின் இரா மரம் சேரார் என்றார்!
எண்ணெய் தேய்த்துக் கொள்ளலாகாத நாட்களில் எண்ணெய் தேய்க்க நேரின் கஞ்சியேனும் நெய்யேனும் நீரேனும் கலந்து விட்டால் குற்றமில்லை யென்னு முறைபற்றி நீர் தொடாது எண்ணெயுரையார் என்றார்.
