வையகம் போற்றும் வான் மறை

இனிய திருக்குர்ஆனே!
இறை மறையே!

நீ!
உலகின் இருளை
ஒழிக்க வந்த பேரொளி!

ஆராய்பவர்களுக்கு
அட்சய பாத்திரம்!

அறிவின் வேர்
வேருக்கு நீர்!

அஞ்ஞானத்தின் பலி பீடம்
விஞ்ஞானத்தின் ஆய்வு கூடம்!

ஆத்மீக சூரியன்
லௌகீக சந்திரன்!


சாந்தி நபியின்
சமாதான தூது!

அதிசய அற்புதம்
அற்புத அதிசயம்!

மனித இலக்கியங்கள் போற்றும்
புனித இலக்கியம்!

நூல்களின் உலகம்
உலகின் நூலகம்!

படைப்பினங்களின்
பூரண சரிதை!

இறைவன் எழுதிய
இனிய கவிதை!

ஓ.....
வான் மறைப் பூவே!
உன்னை ஓத ஓத
புதிது புதிதாயல்லவா
புதுமையாய்ப் பூக்கிறாய்!

நீ
வாடாத பூ!
உதிராத பூ!
இறவாத பூ!
ஒற்றைப்பூ!

உன்
உயர்ந்த எழுத்துக்கள்
உயிரோட்டமானவை!
அறிவு இறந்தவர்களால்
இந்த
உண்மையை உணற முடியாது!

உன் அழகிய கருத்துக்கள்
முழுமையானவை!
அறை குறை அறிவால்
அதை
முழுதாய்ப் புரிய முடியாது!


உன்
கருவூலங்களுக்கு அளவேயில்லை!
ஞானமற்றவர்களால்
உனக்கு வியாக்கியானம்
கூறமுடியாது.!

ஓ....
அல்குர்ஆனே!
நீ ஒரு கடல்.!
உனக்கு வெளியே
கானல் நீர்த் திடல்!

உன்னைக் காப்பவன் இறைவன்.
உன் வழி வாழ்பவனே
உண்மை மனிதன்!
