அப்துல் கலாமுடன் புதியதோர் உலகம் செய்வோம் படக்குழுவினர் சந்திப்பு

டாக்டர் ஏ.பி.ஜெ.அப்துல் கலாம், புதியதோர் உலகம் செய்வோம் படக்குழுவினரை கவர்னர் மாளிகைக்கு அழைத்து ஆசி வழங்கினார்.
"நல்ல கருத்தை வலியுறுத்தும் இத்திரைப்படம் மாபெரும் வெற்றி பெற வேண்டும். இளைஞர்களோடு பெற்றோர்களும் இப்படத்தைப் பார்க்க வேண்டும். பல மொழிகளில் இத்திரைப்படம் வெளிவர வேண்டும்" என்று அப்துல் கலாம் வாழ்த்தினார்.

படத்தின் கிளைமாக்ஸ் காட்சியில் பத்து வயதுப் பையன் ரோஷன் தன் தந்தையைப் பார்த்துப் பேசிய வசனத்தை, நேரில் உணர்ச்சி பொங்க பேசி நடித்துக் காட்டியதைப் பார்த்து டாக்டர் கலாம் உருகிப் போனார். ஆஜித், அனு, யாழினி, சந்தோஷ் பாலாஜி, சூர்யேஸ்வர் ஆகியோர் இப்படத்திலுள்ள "தேசம் எங்கள் தேசம்" பாடலின் சில வரிகளைப் பாடியதைக் கேட்டு மிகவும் ஆனந்த மடைந்தார்.

இச்சந்திப்பின் போது, படத்தின் கதை,திரைக்கதை, வசனம், பாடல்கள் எழுதிய கே.எஸ்.நாகராஜன் ராஜா, தயாரிப்பாளர் எம்.எஸ்.ஜெய்க்குமார், இணைத் தயாரிப்பாளர் பிரியா ஜெய்க்குமார், டாக்டர் அப்துல் கலாமின் அறிவியல் ஆலோசகர் பொன்ராஜ், சமூக சேவகர் அப்துல்கனி ஆகியோர் உடனிருந்தனர்.