போலி அரசியல்வாதி

அரசியலில் தான் இவர்கள் வித்தகரே!
செய்கின்ற செயல் அனைத்தும் வித்தைகளே!
பிறர் மீது குறைகூறல் வாடிக்கையே!
அது இவருக்கே திரும்பிவர வேடிக்கையே!

இவர் ஆடும் சதுரங்கத்தில் நேர்மையில்லை
சுவர் தாண்டும் ஆட்டமதில் தோல்வியில்லை
எவர் பேச்சும் இவர்காதில் விழுவதில்லை
தன் மனதில் பழுதிருந்தும் அழுவ‌தில்லை

பதவிபக்கம் எப்பொழுதும் காற்று வீசும்
உதவிசெய்ய பணமிருந்தால் மட்டும் பேசும்
மக்கள் படும்பாடு ஏதும் இவரறியார்
தன்பதவி பற்றிக்கொள்ள ஏதும் செய்வார்

வாக்குறுதி சுடச்சுடவே தினம் கொடுப்பார்
வாக்கினையே அன்றிரவு இவர் மறப்பார்
மூக்குடைந்து ஒருநாள் தான் வெளிப்படுவார்
நேக்குடனே காய்களைத் தான் நகர்திடுவார்

அடையாளம் இவரைக் காணல் அவசியமே
விடைகொடுத்து வீட்டுக் க‌னுப்புவது அவசரமே
ஓட்டு எனும் பெரும்சக்தி நமக்குண்டு
திட்டமிட்டு பயன்படுத்த ஒருநாள் வெற்றியுண்டு