இரத்த போர்

மனிதத் தனத்தின் முற்றுப்புள்ளியாய்
மனிதன் மனிதனை அழிப்பதுவோ?
மனித இனமே சரிந்து போயின்
நிலத்தை எலும்புகள் ஆள்வதுவோ?
வீசும் எரிபொருள் வீசியபோது
விழுந்து எரிந்தது பிஞ்சுகளோ!
காணும் காட்சிகள் கண்டபொழுது
கண்ணீர் மட்டும் மொழிகளோ!
♦

தலைமுறை அங்கு தலைகளின்றி
தத் தளிப்பதை பாருங்கள்!
தாயின் சடலம் எதுவோ யென்று?
தேடும் பிள்ளையை பாருங்கள்!
நடப்பவை எல்லாம் எதற்கு என்று?
கேட்கும் கண்களை பாருங்கள்!
இன்னும் கூட சொல்ல வேண்டுமா?
அதோ! குழந்தை சிரிப்பை பாருங்கள்!
♦

நாளைய ஔிகள் நிரந்தர இருட்டில்
வாழும் நிலைமை வருகிறதே!
எஞ்சிய உயிர்கள் கா ணொளியில்
உயிர் பிச்சை கேட்கிறதே!
நடப்பவை எல்லாம் பார்த்துக்கொண்டே
பாதி உலகம் நிற்கிறதே!
பொய்கள் இங்கு வென்றுகொண்டால்
ஆண்டவன் தீர்ப்பு இருக்கிறதே!
♦

வலிகள் தாங்கிய அனைத்து உயிரும்
வழிகள் தேடித் செல்லட்டும்!
தாயை இழந்த வளர் பிறைகள்
பூமியை ஆள நேரட்டும்!
காலம் கடந்து போர்கள் முடிந்து
மிஞ்சிய உயிர்கள் வாழட்டும்!
இதுபோல், ஒருநாள் நமக்கும் நடக்கும்
அன்று, மனிதர் உணரட்டும்!
♦