கடல் சொப்பனங்கள்
ஈரக்கையால் தொடுவாய்.
ஆங்கிலப்பட டைட்டில்
விடாமல் வாசிப்பாய்.
எறும்பு வரிசையை
தாண்டித்தான் செல்வாய்.
பஷீரை வாசித்து
கண் துளிர்க்க பார்ப்பாய்.
கேள்விகள் கேட்டு
பதில் வேண்டிய கண்கள்
ஓடும் கேள்வியின் பின்னே.
உனது வளையலோசையில்
சுவர்களும் சிரிக்கும்.
உன் கொலுசொலியின் பின்னே
அலைகின்றன அறைகள்.
ரோஸிக்கு ஊட்டுகையில்
மொட்டுக்கள் மலர்வதாய்
திறந்து மூடுவதான
உனது அதரத்தில்
கொலுவாகும் புன்சிரிப்பு.
இந்நேரம் கடந்திருக்கும்
அந்த ரயில் உன்னுடன்.
என்ன சொல்வதென
தெரியவில்லை
உன்னைத்தேடி
மலங்க மலங்க முழிக்கும்
இந்த பூனைக்குட்டிக்கு.
