பண்பின் தகுதி - நேரிசை வெண்பா
பண்புடையவர், பண்பற்றவர், பாவிகள், பாவஞ் செய்யாதவர், நண்பர், நண்பரல்லார் இவர்களை நாம் கொள்ள வேண்டிய முறைமைகளைப் பற்றி மதுரையிற் பாடிய செய்யுள் இது
நேரிசை வெண்பா
பண்புளருக் கோர்பறவை பாவத்திற் கோரிலக்கம்
நண்பிலரைக் கண்டக்கால் நாற்காலி - திண்புவியை
ஆள்வார் மதுரை யழகியசொக் கர்க்கரவம்
நீள்வா கனநன் னிலம். 207
- கவி காளமேகம்
பொருளுரை:
"பண்புள்ளவர்களுக்கு ஒர் பறவை (அது ஈ - கொடு); பாவத்திற்கு ஒர் இலக்கம் (அது அஞ்சு (5) பாவத்திற்கு அஞ்சி ஒதுங்க வேண்டும் என்பது கருத்து); நண்பில்லாதவரைக் கண்டால் நாற்காலி - (அது விலங்கு - விலகிப் போய்விடு) என்பது பொருள்.
செறிவுற்ற நிலத்தினை எல்லாம் ஆட்கொள்பவராகிய மதுரை நகரத்து அழகிய சொக்கநாதப் பெருமானுக்கு நிலையாகப் (அரவம் – வாகனம், நன்னிலம் என்க) பணிவிடை செய்”
பண்பாளர்க்குக் கொடுத்தும், பாவத்திற்கு அஞ்சியும், பகைவரிடத்திலிருந்து விலகியும், சொக்கநாதப் பெருமானுக்குப் பணிவிடை செய்தும் வாழ்வாயாக என்பது கருத்து.
'ஓர் பறவை' என்பதனை, ஒப்பற்ற பறவை' எனப் பொருள் கொண்டால், 'அன்னம்' என்றாகிச் சோறிடுதலைக் குறித்ததாக அமையும்.
