பேணாது ஊன் உண் விழைவார்க்கு உயிரோம்பல் இல்லை – அறநெறிச்சாரம் 104
இன்னிசை வெண்பா
பெண்விழைவார்க் கில்லை பெருந்தூய்மை பேணாதூன்
உண்விழைவார்க் கில்லை உயிரோம்பல் எப்பொழுதும்
மண்விழைவார்க் கில்லை மறமின்மை மாணாது
தம்விழைவார்க் கில்லை தவம் 104
– அறநெறிச்சாரம்
பொருளுரை:
பிற மகளிரை விரும்புவாரிடத்து மாசின்மை இல்லை,
அருளை விரும்பாமல் புலாலுண்ணலை விரும்புவாரிடத்து உயிர்களைக் காக்குந் தன்மை இல்லை,
எக்காலத்தும் அயலானது நாட்டினைக் கவர விரும்புவாரிடத்து அறம் இல்லை,
பெருமைக்கு ஏலாத செயல்களைச் செய்து தம்மைக் காக்க விரும்புவாரிடத்துத் தவவொழுக்கம் இல்லை
குறிப்பு:
உண் - உண்ணல் முதனிலைத் தொழிற்பெயர். மறமின்மை - அறம் மறத்தின் எதிரது அறமாதலின்.
