பள்ளித் தோழி

பேரங்காடியில்
ஓரங்க நாடகம்
நடத்திப் பார்த்தேன்
அவளிடம் கேட்டு விடலாமா
கேட்காமலே விட்டு விடலாமா
௦
நான் நினைக்கும் பெண்ணா-இல்லை
இவள் வேறொரு பெண்ணா?
ஐயம் ஆட்கொண்டாலும்-மனமோ
அவள் நினைவில்
மையல் கொண்டது
௦
அவள்
அழகை ஆயுள் கொஞ்சம்
அள்ளித் திண்றிருக்க
புன்னகையை குடும்பச் சுமைகள்
கொஞ்சம் கொன்றிருக்க
துறுதுறு பேச்சும்
துடிப்பான செய்கையும் கூட
கொஞ்சம் காணாமல் போயிருந்தது
௦
நான் கொண்ட நட்பும்
அவள் கொண்ட பாசமும்
மாறாமல் இருக்குமா?
என் பெயரும் முகமும்
நினைவில் நிற்குமா?
௦
எண்ணம் வந்து
எதோதோ சொன்னாலும்
திண்ணம் கொண்டே
கேட்டும் விட்டேன்
௦
நி..நி..நீ..நீ.நீ.. நீங்க.....
அவள் பெயரைச் சொல்லி
கேட்ட போது
ஆச்சர்ய குறிகள்
அவள் முகமெங்கும்
௦
அடுத்த நொடி
என் பெயரைச் சொல்லி
நலம் கேட்க
நானோ
அவள் நியபக சக்தியை
மெச்சுவேனா?-இல்லை
என் நட்பை மெச்சுவேனா?
௦
எட்டு வருடங்கள்
சிட்டாய் பறந்து சென்றாலும்
மறவா நட்பில் மிகிழ்ந்தேன்
௦
புத்தக இரவல்
உணவுப் பரிமாற்றம்
பள்ளிக் குறும்புகள்
சின்னச் சின்ன சண்டைகள்
இறுதித் தேர்வின் இறுதியில்
நண்பர்கள் கூட்டமாய்
சென்று பார்த்த சினிமா
எல்லாமும்
கொஞ்ச நேரத்தில்
கதை பேசி கலந்துரையாட
மீண்டும் சந்திப்பதை
உறுதி செய்யாமல்
விடை பெற்றாள்
௦
நான்
அங்கிருந்தே
என் பள்ளிக்கு மீண்டும் போனேன்
நினனைவுகளால்..........