இரவின் சப்தம் --------------------------

நாளை நான் செல்லும் பாதையில் தண்டனை என்ற பெயரில் மரங்கள் எல்லாம் தலை கீழாய் முளைத்திருக்க முடியும் .

என் வாகனத்தை விட வேகமாய் மணல் பறந்து செல்ல முடியும் .

வானவில் கீழிறங்கி பூமியிலே அமர்ந்திருக்கவும் முடியும்; சிறுவர்கள் அதன் வழியே பயணம் செய்யவும் முடியும் .

மழை பூமிக்குள் இருந்து தோன்றி எம்மை கரைத்து விட்டு மேலே செல்லவும் முடியும் ;தப்பிச்செல்வதாய் நாம் நினைக்க .

காற்றுக்கு சிறகு முளைத்து அதன் முதுகிலிருந்து சில மனிதர்கள் பூமிக்கு வந்திறங்க முடியும் ; அவர்களை நாம் வியக்கலாம் .

கைகோர்த்த காதல் ஜோடிப்பறவைகள் வீதியோரமாய் நடந்து செல்ல முடியும்.

இவைகளை நீங்களும் நானும் காண நேரிடலாம் ; நான் தயாராகின்றேன் .நீங்களும் அப்படியே செய்க.

இரவின் கடைசிப்பகுதியில் கேட்ட சப்தத்தை இப்படித்தான் மொழிபெயர்க்க முடிந்தது .

Ahamed Jahan -Pottuvil .