அரசியல் களம்

தேர்தல் நாட்களில்
மதுபானக் கடைகளுக்கு
விடுமுறை விட்டால் என்ன
விடாவிட்டால் என்ன –

சரக்கை அள்ளிச் செல்லும்
தொண்டர்களால்
காலியாகத்தானே கிடக்கிறது
கடை !
************

கட்சிகள்
தங்கள் சாதனைகளை
பட்டியிலிடாமல்
மாற்றுக் கட்சிகளின் குறைகளை
வெளிப்படுத்துவதும் நல்லதுதான் –

எல்லோருடைய வண்டவாளமும்
தண்டவாளம் ஏறுகிறதே !
**************

வாக்குக்காக
பணம் கொடுக்கும் கட்சிகளுக்கு
பயமிருக்க நியாயம் இல்லைதான் –

வாக்காளன்
தான் கையேந்தி வாங்கியதை
ஒப்புக் கொண்டு
தானும் கம்பி எண்ண
நினைப்பானா என்ன ?
**********

திட்டங்களை நிறைவேற்ற
இன்னும் ஒரு முறை
வாய்ப்புத் தாருங்கள் என்று
இந்த முறையும்
கெஞ்சுகிறார்கள் -

எதையும் மறக்கும்
நம்மை
புரிந்து கொண்ட
அவர்கள் !
************

வெற்றி பெற்றபின்
ஐந்தாண்டுகளில்
நீங்கள் சாதித்தது என்ன என்று
சம்பந்தப்பட்டவரைக் கேட்டால்,
அவரின் பதில் இதுதானாம் –

“பதவியைக் காப்பாற்றியது”
************

ஆண்டவன்கூட
ஆண்டுக்கு ஒரு முறை
பக்தர்களைச் சந்திக்க
ஊர்வலம் வருகிறான் –

ஐந்தாண்டுக்கு
ஒரு முறைதான்
தலை காட்டுகிறார்
அரசியல்வாதி!
************