கோட்டோவிய மழலைகள் 17 - பழனி குமார்
கோட்டோவிய மழலைகள் கண்டேன்
பாட்டோவியம் வடித்திட நினைத்தேன் !
வீட்டோவிய உள்ளங்கள் உவகைபெறும்
தீட்டாத உயிரோவியம் மழலையாலே !
பருவத்தின் சிறப்பையும் அறிந்திடாது
உருவத்தின் உயர்வையும் உணராது !
சிரித்தே கிறங்ககடிக்கும் சூழ்வோரை
சிந்தையும் சிறகடிக்கும் சூழ்நிலையால் !
சிந்திக்கவும் வைத்திடும் சிறுஉருவம்
நிந்திக்கும் எண்ணமும் துறந்திடும் !
சிறுநகையும் அணிந்திடா தங்கமலர்
குறுநகையால் ஈர்த்திடும் குறிஞ்சிமலர் !
அறியாமல் செய்திடும் குறும்புகள்
அடிமனதில் இனித்திடும் கரும்பாய் !
கரைந்திடும் மணித்துளிகள் காற்றாய்
உருவாகிடும் இன்பத்தேன் ஊற்றாய் !
இன்னல்களை மறந்திடும் இதயங்களும்
இல்லங்களில் தவழ்ந்திடும் மழலையால் !
காட்சிகளும் மாறிடுமே முப்பொழுதும்
கானங்களும் பாடிடுமே எப்பொழுதும் !
ஓவியமாய் ஒளிர்ந்திடும் மழலைகளை
காவியமாய் போற்றிடுவோம் என்றும் !
இன்பம்தரும் மழலைகள் குளிர்நிலவு
இதமாக்கும் இதயங்களை பகலிரவு !
மயக்கிடும் மலர்வனமே மழலைகள்
மணந்திடும் நந்தவனமே மழலைகள் !
சுவைத்திடும் கனிகளே மழலைகள்
சுகம்தரும் இராகங்களே மழலைகள் !
பழனி குமார்
