பேயாய் அலைகிறான் -Mano Red
உயிர் எடுப்பது போல
உணர்வுகளை தீண்டுகிறான்,
உடல் தொட்டு
உரசிவிட்டு
உவமைகளில் பேசுகிறான்..!!
நெரிசல் பேருந்தில்
நெருங்கி வருகிறான்,
இடைஞ்சலில்
இடமில்லாத போதும்
இடைசொருகி
பெண்ணிடை தொடுகிறான்..!!
உக்கிரமாய்
பார்வை வீசி,
வக்கிரமாய்
வார்த்தை பேசுகிறான்,
எச்சில் ஒழுக
கொச்சையாய் நின்று
தெருவோரத்தில் சிரிக்கிறான்..!!
இரட்டை அர்த்தத்தில்
விரட்டி அடிக்கிறான்,
இருட்டில் சுற்றும்
மிரட்டல் ஆந்தையாய்
காமக்கண்ணை உருட்டுகிறான்..!!
பெண்வாசம் நுகர
பேயாய் அலைகிறான்,
தாய் தங்கையும் பெண்தானே
தரம் தாழ்த்த மறுக்கும்
தாரமும் பெண்தானே -இதை
பொதுவிடத்தில் உணர மறுக்கிறான்..!!
