முத்துமாரி
எங்கள் முத்து மாரி யம்மை
. எட்டு திக்கும் காப்பாள்
எங்கள் முத்து மாரி யம்மை
. ஏழு கண்டம் கோப்பாள்
சிங்கம் மீது லாவும் மாரி
. சிறுமை எண்ணம் மாய்ப்பாள்
தங்க முத்து மாரி கெட்ட
. தர்க்கர் தம்மை ஏய்ப்பாள் !
தீயி னோடும் வளியி னோடும்
. திமிரு மெங்க ளம்மை !
வாயி லாடும் வார்த்தை யாக
. வாழ்வ தெங்க ளம்மை !
மாய மான நெஞ்சி னாட்டம்
. மாற்றம் செய்வ தம்மை !
காயு மம்மை கனியி லம்மை
. கவிதை செய்வ தம்மை !
போக மெங்க ளம்மை ! நல்ல
. போதை எங்க ளம்மை !
யோக மெங்க ளம்மை ! மதியின்
. யோச னைக ளம்மை !
வேகம் நல்கி வேதம் நல்கி
. வேண்டும் யாவும் நல்கும்
நாக மோதி ரந்த ரித்த
. நங்கை எங்க ளம்மை !
அச்ச மற்ற ஆண்மை நெஞ்சம்
. ஆக்கி வைப்ப தம்மை
உச்சி ஆளும் வர்க்கத் தினினும்
. உயர்ந்த மான மென்னும்
அச்சி னுக்கு ளொளிரு மம்மை !
. அன்புத் தெய்வ மம்மை !
பிச்சை கேட்ட தேவர்ப் பாகப்
. பச்சை யெங்க ளம்மை !
ஆட்ட மாடும் கேட்டி னுக்கும்
. அந்த மெங்க ளம்மை !
வாட்டு கின்ற கலியில் வலிமை
. வார்க்கும் சோதி யம்மை !
பூட்டு மம்மை சாவி யம்மை
. புதிரு மெங்க ளம்மை!
பாட்டி சைத்துப் போற்று வோர்க்குப்
. பலம்கொ டுக்கு மம்மை
-விவேக்பாரதி
படம் : சுதன் காளிதாஸ்
