என்னுயிர்த்தோழி

எனக்கோர் தோழி இருக்கின்றாள்
***என்னுள் கலந்தே உயிர்க்கின்றாள் !
மனத்தில் உழலும் துயரறுக்க
***மௌன மொழியாய்த் துணையிருப்பாள் !
வனப்பாய் வளைய வந்தவளும்
***மன்றந் தனிலே சிறக்கவைப்பாள் !
கனவில் கூடத் தோன்றிடுவாள்
***கருத்தாய் வடிவம் காட்டிடுவாள் !!

இயல்பாய் வருவாள் சிலநேரம்
***இழுத்தும் வருவேன் சிலநேரம்
தயவாய் வருவாள் சிலநேரம்
***தவிக்க விடுவாள் சிலநேரம்
மயங்கச் செய்வாள் மரபினிலே
***மையல் கொண்டே அரவணைப்பேன் !
முயன்றும் தோற்பேன் அவளிடத்தில்
***முடிவி லிணைவேன் வெற்றியுடன் !!

அள்ளு மழகைப் படம்பிடித்தே
***அவளுள் செதுக்கிக் களித்திடுவேன் !
முள்ளாய்த் தைக்கும் கொடுமைகளை
***முனைந்து முடிந்து வைத்திடுவேன் !
கள்ள மில்லாக் காதலையும்
***கனிவா யினிதே கலந்திடுவேன் !
கிள்ளை மொழியாய்ப் பிதற்றிடினும்
***கிறுக்காய்த் தொடர்வேன் அவளுடனே !!

மின்னல் கீற்றாய் வெளிப்பட்டே
***மிடுக்காய் நடையில் கவர்ந்திடுவாள் !
தென்றல் காற்றாய் வருடிவிட்டுச்
***சிலிர்த்த இதயம் நனைத்திடுவாள் !
என்றன் இனிய தோழிக்கே
***இனிதாய் வாழ்த்து பாடிடுவேன் !
கன்னல் பெண்ணாம் கவிதையவள்
***கண்ணின் மணியாய் வாழியவே !!

சியாமளா ராஜசேகர்