மழை
#மழை
மரம் செடிகளை குளிப்பாட்டவும்
சாலை, வீதிகளை கழுவி விடவும்
இயற்கை என்றோ ஒருநாள்
அனுப்பி வைக்கும் பணியாள்..!
புதுமண தம்பதியர்க்கு
அறுபது நாட்கள் மேலான போதும்
இடையறாது விசிறிவிடும்
இம்சையான வெண்சாமரம்..!
காதலர்க்கு தீமூட்டும்
குளிர்ச்சியான நீர் தீவட்டி..!
காத்திருக்கும் உழவனை
காணாமலே காவு கொள்ளும்
மாயப் பேய்..!
ஏழை வீட்டுக் கூரை மேல்
எட்டிப்பார்த்து தாளமிடும்
ஜலதரங்க வாத்தியக்காரன்..!
கடந்த வருடம்
வெள்ளமாய் வந்தபோது
கணக்கில்லாது உயிர்களை
வாரி சுருட்டிக் கொண்ட எமன்..!
வந்தும் உயிர் கொண்டுபோகும்
வராமலும் உயிர் கொண்டுபோகும்
ஈவிரக்கமற்ற அரக்கன்..!
வராது பொய்க்கும்
மழையை திட்டி தீர்த்தபோது
அது தீர்க்கமாய்
எழுதி அனுப்பிய கடிதம்
"மழை வேண்டும் மானுடரே
நான் வருவதற்கு பூசை வேண்டாம்..
என்னை வரவேற்க
பூச்செண்டும் வேண்டாம்..
என் கரங்கள் வருடுதற்கு
மரங்கள் வேண்டும்
நட்டு வையுங்கள்..!
மரங்களின்
தலை வருடி செல்லும் நாளில்
பார்க்கும் இடமெல்லாம்
பச்சைக் கம்பளம் விரிக்கிறேன்..!"
மழையின் கடிதம் எனக்கானது மட்டுமில்லை..!
உங்களுக்கானதும்தான் ..!
#சொ.சாந்தி
மீள் பதிவு

