மௌனத்தின் சிலிர்ப்பு
மௌனத்தின் சிலிர்ப்பு..!
மௌனத்தில்
ஒளிந்து கிடக்கிறது
எண்ணிலடங்கா சொற்கள்..!
வெளிவரத் துடிக்கும்
நேரங்களில் எல்லாம்
கூட்டினுள் ஒளியும்
நத்தையாகி விடுகிறது
சிறிதும் பெரிதுமான சொற்கள்..!
பிரச்சினைகளை
சந்திக்கும்
துணிவை இழந்து விடுகின்றன
வித வித மௌனங்கள்..!
சொற்கள் மௌனத்தவம் புரிகையில்
பிரச்சினைகள் இல்லை என்று
யார் சொன்னது. ?
பல பிரச்சினைகள்
மௌனத்தினால் தான்
பூதாகரமாய் உருப்பெற்று விடுகின்றன..
நேரத்திற்கு ஏற்ப
சாதிக்கப் படாத மௌனங்கள்
நிலை குலைய செய்துவிடும்
என்பதாலோ என்னவோ
மௌனம்
எப்போதும் மௌனமாகவே
இருக்கிறது பல நேரங்களில்..!
மௌனத்தின் மோன நிலையை
காற்றின் அசைவில்
இருந்தும் காப்பாற்றி வைக்க
நினைக்கையில்
சிலிர்த்துக் கொள்கிறது
சில பல சொற்கள்..
இந்தக் கவிதையைப் போலவே..!
#சொ.சாந்தி
