இனியில்லை மரத்தட்டுப்பாடு
ஈர்ப்புவிசை உள்ளவரை
விரிந்து கிடக்குது
எங்கள் உலகம்
உங்கள் கால்கள்
படரும் பரப்பை விட
எங்கள் இறக்கைகளின் புழக்கம் விசாலமானது
நன்மையை மட்டும் விதைத்திடும்
உன்னத படைப்புகள் நாங்கள்
இறைச்சிகளாய் மட்டுமெங்களை
குறைத்து மதிப்பிடாதீர்!
இயற்கையின் காவலர் நாங்கள்
அது விரும்பும் காதலும் நாங்களே!
இயற்கையை பாதுகாப்போம் என்று
நாங்கள் கூட்டம் கூட்டுவதில்லை
பேட்டி கொடுப்பதில்லை
என்றும் நாங்கள் நடிகர்களாக மாறுவதில்லை
நாங்கள் நாங்களாகத்தான் வாழ்கிறோம்
கையில் அலைபேசியுடன்
உறைந்து கிடக்கும்
உங்களைப் பார்க்கும்பொழுது
எங்களை விரட்ட
சோளக்கொல்லை பொம்மைகள்
இனி தேவையில்லை உங்களுக்கு!
உங்கள் பயிர்களை விட
அதை அழித்திடும் பூச்சிகளும் புழுக்களுமே
எங்களுக்கு பிடித்த உணவு
வெட்டுக்கிளிகள் படையெடுப்பு
புரியவைத்திருக்கும் உங்களுக்கு
சாலையோர மரங்கள்
இனி தேவையில்லை உங்களுக்கு
குளிரூட்டப்பட்ட ஊர்திகளில் பயணம்
சாலையோர
அழகுச் செடிகளைப் பார்த்துக்கொண்டே
இப்பொழுதெல்லாம்
மரங்களின் பற்றாக்குறை
எங்களுக்கும் தெரிவதில்லை
ஏனென்றால்..
எங்களின் எண்ணிக்கையும் குறைந்தன அவ்வளவே!
