எந்த உயிர்க்கும் இடர்சிறிதும் நேராமல் முந்த ஒழுகும் முறையினர் - கொலை, தருமதீபிகை 710

நேரிசை வெண்பா

எந்த உயிர்க்கும் இடர்சிறிதும் நேராமல்
முந்த ஒழுகும் முறையினரே - வந்த
பிறவிப் பெரும்பயனைப் பெற்றார் பிறவா
அறவர் அவரே அறி. 710

- கொலை, தருமதீபிகை,
- கவிராஜ பண்டிதர் ஜெகவீர பாண்டியனார்

பொருளுரை:

புழு, பூச்சி முதலிய எந்த உயிர்க்கும் யாதொரு இடரும் நேராமல் அருள்புரிந்து ஒழுகும் இனிய நீர்மையாளரே பிறவிப் பயனைப் பெற்ற பெரிய புண்ணிய சீலர்; அரிய கண்ணிய நீரர்; இவ்வுண்மையை ஓர்ந்து உய்தி பெறுக என்கிறார் கவிராஜ பண்டிதர்.

தான் சுகமாக வாழ விரும்புகின்றவன் எந்த உயிருக்கும் யாண்டும் யாதொரு துயரும் செய்யலாகாது. இந்த நியமம் தவறி நடந்தால் அந்த மனித வாழ்க்கையில் அல்லல்கள் தொடர்ந்து அவலங்கள் புகுந்து அழிகேடுகள் படர்ந்து கொள்கின்றன.

தாம் செய்த செயல்களின் பலன்களை அனுபவியாமல் யாரும் மீறிப் போகமுடியாது. இயற்கை நியதியின்படியே யாவும் இயங்கி வருகின்றன. மனிதனுடைய எண்ணங்கள் நல்லனவாயின் நலமான இன்பங்கள் பலன்களாய் வருகின்றன; அவை தீயனவாயின் தீமையான துன்பங்கள் செழித்து வளர்ந்து எவ்வழியும் வெவ்விய அவலங்களை விளைத்து நிற்கின்றன.

In the soul of man there is a justice whose retributions are instant and entire. H (Ethics)

’மனிதனுடைய சீவனில் ஒரு நீதியிருக்கிறது; அதனுடைய கரும பலன்களை உடனே முழுவதும் அதற்கு அது ஊட்டிவிடுகிறது’ என்னும் இந்த ஆங்கில வாசகம் ஊன்றி உணர வுரியது.

நேரிசை வெண்பா

தாந்தாமுன் செய்தவினை தாமே யநுபவிப்பார்
பூந்தா மரையோன் பொறிவழியே; – வேந்தே!
ஒறுத்தாரை யென்செயலாம் ஊரெல்லாம் ஒன்றாய்
வெறுத்தாலும் போமோ விதி. 30 நல்வழி

செய்த வினைப்பயன்கள் சீவர்களை எவ்வழியும் வந்து சேர்ந்து கொள்ளும்; அவற்றை அவர் அனுபவித்தேயாக வேண்டும் என இது உணர்த்தியுள்ளது. இனிய வினைகளைச் செய்தவன் இன்பங்களை நுகர்ந்து மகிழ்கிறான்; கொடிய செயல்களைச் செய்தவன் துன்பங்களை அனுபவித்துத் துயரில் உழல்கின்றான்.

ஒருவன் நல்ல கருமங்களைச் செய்யின் அவன் நல்லவனாய் உயர்கின்றான். தீயவினைகளைச் செய்யின் தீயவனாய் இழிகிறான்.

Io, who does a good deed, is instantly ennobled. He who does a mean deed, is by the action itself contracted. [Emerson]

'நல்வினை செய்பவன் அதனால் உடனே மேன்மை அடைந்து ஒளி பெறுகின்றான்; தீவினை செய்தவன் தாழ்ந்து இழிவுறுகின்றான்’ என எமர்சன் என்னும் அமெரிக்க அறிஞர் இவ்வாறு கூறியுள்ளார். வினையின் விளைவுகள் விழிதெரிய வந்தன.

தன் உயிர்க்கு நன்மையை நாடுகின்றவன் மறந்தும் தீமையை நாடான்; எவ்வழியும் நல்ல எண்ணங்களையே எண்ணி வருபவன் புண்ணிய சீலனாய்ப் பொலிந்து திகழ்கின்றான்.

எல்லா அல்லல்களும் நீங்கி என்றும் அழியாத நல்லநிலையை அடைந்து கொள்வதே உயர்ந்த மனிதப் பிறவியின் பயனாம். அரிய பெரிய அந்த இனிய பேற்றைப் பெற உரியவன் யாண்டும் அருள்நலம் பேணிப் புனிதனாய் ஒழுகி வரவேண்டும்.

வெண்டளை பயிலும் கலிவிருத்தம்

கொல்லான்பொய் கூறான் களவிலான் எண்குணன்
நல்லான் அடக்க முடையான் நடுச்செய்ய
வல்லான் பகுத்துண்பான் மாசிலான் கட்காமம்
இல்லான் நியமத் திடையில்நின் றானே. 1 - 2. இயமம், மூன்றாம் தந்திரம், திருமூலர் திருமந்திரம், பத்தாம் திருமுறை

மேலான கதியை அடைய உரிய மனிதனது புனிதநிலைகளை இது உணர்த்தியுள்ளது. கொலை முதலிய தீமைகள் யாதும் இலனாய் எவ்வுயிர்க்கும் இதமாய்த் தண்ணளி புரிந்து ஒழுகி வருபவன் புண்ணிய நீரனாய் உயர்ந்து பேரின்ப நிலையை அடைகிறான்.

நேரிசை வெண்பா

கொல்லான் கொலைபுரியான் பொய்யான் பிறர்மனைமேல்
செல்லான் சிறியார் இனஞ்சேரான் - சொல்லும்
மறையிற் செவியிலன் தீச்சொற்கண் மூங்கை
இறையிற் பெரியாற்(கு) இவை. 19 ஏலாதி

கொலை முதலிய தீமைகளின்றி வாழ்பவரே தலைமையான நிலையினர் என்னும் இது இங்கே நினைந்து சிந்திக்கத் தக்கது என்கிறார் கவிராஜ பண்டிதர்.