கடவுளின் கடை
பிஸியான பிசாசும் ஈ ஓட்டும் கடவுளும்..
🌺🌺🌺🌺🌺🌺🌺🌺🌺🌺🌺
கடை விரித்துள்ளார்கள்
கடவுளும் பிசாசும்
உள்ளங்களுக்குள்ளே !
கனத்துக் கேட்கிறது பிசாசின் கூக்குரல்!
கவர்ச்சியான பொய்மைகள்
உள்ளத்தைக் கொள்ளை கொள்ள
எல்லா உள்ளங்களும் முண்டியடிக்கின்றன !
பிசாசின் பெரிய கடையில்
வளமான வணிகம் !
கத்திகத்தி தொண்டைக் கமற
மெலிந்து போகிறது
கேட்பாரற்ற
மேலோனின் மென்குரல் !
போணியாகாத மெய்மைகளைப்
போற்றிப் பாதுகாக்கிறார்
கடவுள்!
வாங்க எத்தனிக்கும் சிற்சிலரும்
உள்ளே நுழைய இயலாத
குறுகிய வாசல் !
கடவுள் வாசலை இடிக்க வேண்டும்
இன்றேல்
கடையை மூடிட வேண்டும்
முணுமுணுத்துத் திரும்புகின்றனர்
திருப்தியில்லாப் பயனாளிகள் !!
- யாதுமறியான்.
