122 இணைபிரியாது இருக்க நல்கும் இடம்பொருள் பேரின்பே - கணவன் மனைவியர் இயல்பு 14

அறுசீர் கழிநெடிலடி ஆசிரிய விருத்தம்
(காய் 4 / மா தேமா)
(காய் வருமிடத்தில் விளம் வரலாம்)

ஏந்தலாந் தந்தைத்தாய் சகியர்கோ யிலைவிட்டோர்
..எளியர் சிற்றில்
சார்ந்தனனென் றிகழுமின்னே சிற்றில்லால் அவரருகே
..தங்கப் பெற்றேன்
சேர்ந்தமிடி யாலவர்தம் பணியாவும் என்கையாற்
..செய்யப் பெற்றேன்
பாந்தவமீ தின்றியெந்தை அன்னையைவே(று) ஆக்குநிதி
..பாழ்த்த தன்றோ. 14

- கணவன் மனைவியர் இயல்பு, நீதிநூல்
- மாயூரம் வேதநாயகம் பிள்ளை பாடல்

பொருளுரை:

பெருமை மிக்க தந்தை தாயாரை, தோழியரை, பிறந்த பெரிய மாளிகையை விட்டு ஓர் எளியாருடைய சிறிய வீட்டைச் சார்ந்தேன் என்று குறை சொல்லும் தோழியே! சிறு வீடாக இருப்பதால் அவரருகிலேயே தங்கியிருக்கும் வாய்ப்பைப் பெற்றேன். ஏற்பட்ட வறுமையினால் கணவனுக்கு வேண்டும் பணிகள் எல்லாவற்றையும் நானே என் கையால் செய்கின்றேன். இவையே எனக்கு சிறந்த தவமாகும்.

அவ்வாறின்றி, என் தந்தையும், அன்னையும் எப்பொழுதும் ஒன்றாக இருக்க இயலாமல் வேறுபடுத்தி அமையும் பெரிய மாளிகையும், பெரும் பொருளும் பயனில்லாமல் போகும் அல்லவா? என்று பிறந்த இடத்தை விட, புகுந்த இடம் சிறிதாகவும், வசதிக் குறைவாக இருந்தாலும் ஒரு பெண்ணுக்கு அதுவே மகிழ்ச்சி தரும் என்று இவ்வாசிரியர் கூறுகிறார்.

ஏந்தல் - பெருமை. கோயில் – பெரிய மாளிகை. மிடி - வறுமை. பா - அழகு; சிறப்பு.
பாழ்தல் - பயனில்லாமற் போதல்.