வஞ்சனை செய்வாரடி

உடலின் ரணப்பகுதியை குத்திக் கிழித்தார்கள்
பிள்ளையை பசியோடு விட்டுவிட்டு
கிடைத்ததை தானுண்டார்கள்
வானத்து நிலவில் வேலை வாங்கித்
தருவதாக சொல்லி
பணம் கறந்தார்கள்
செவ்வாய் கிரகத்தில்
அடுக்குமாடி குடியிருப்பு
கட்டயிருப்பதாகச் சொல்லி
முன்பணம் வாங்கினார்கள்
மற்றொருவன் வீட்டு மனையை
தன்னுடையதாகச் சொல்லி
ஏமாந்தவன் தலையில் கட்டினார்கள்
வாஸ்துபடி வீட்டை மாற்றியமைத்தால்
குபேரன் வந்து குடியிருப்பான்
என வாய் கூசாமல் பொய் சொல்லி
வருமானம் ஈட்டினார்கள்
அயல்நாட்டில் வேலை
ஆயிரக்கணக்கில் சம்பளம்
என ஆசைகாட்டி
அடிமாடுகளைப் போல்
விமானத்தில் ஏற்றி
கண்காணாத இடத்திற்கு அனுப்பிவைத்தார்கள்
அவர்களிடம் உச்சத்திற்கு சென்றது எப்படி
என்று கேட்டால்
கஷ்டப்பட்டேன், காலில் விழுந்தேன்
என கதையளப்பார்கள்.