துணிந்தால்..

வாழ்க்கையே வாழ்க்கையே
வலிகள் நிறைந்ததடா.
வலிகளை நீ கடந்து விட்டால்
இன்பம் உள்ளதடா.
வலியின்றி எதுவுமிங்கு
இயங்காது உண்மையடா.
தாய் கொண்ட வலிகள் மட்டும்
சில நொடிகள் இன்பமடா.
வலித்தாலும் வலித்திடுமே
அது தானே வாழ்க்கையடா

பூக்கள் கொஞ்சம் வலிகள் கொண்டால்
பூவாசம் வீசுமடா.
இரு தோள்கள் தன்னில் வலிகள் கொண்டால்
உன் வாழ்வில் இன்பமடா.
வேர் கொண்ட மரம் தாங்க
தரை மடிக்கு வலிக்குமடா.
இருந்தாலும் வெயிலினிலே - நிழல்
தரும் போது சுகம்டா.
வலிகளை நீ வலிகளை நீ
வெறுத்திட நினைக்காதே
வெறுப்பதனால் வலிகளொன்றும்
தென்றல் வீசாதே.
தாங்கிக் கொள்ளும் இதயம் தான்
போராடும் நிற்காதே.!

முட்கள் மீது நடந்து பழகினால்
ரத்தம் எட்டி பார்த்திடுமே.
மீண்டும் மீண்டும் நடந்து பாரடா
ரத்தம் சிந்த பயந்திடுமே.!
துயரம் தன்னில் சிரித்தால் - உன்னை
துயரம் விட்டு ஓடிடுமே.
துயரம் விரைவாய் மறைந்து விட்டு
இன்பம் நாடி வந்திடுமே.!
கவலைகளை கைக்கழுவ
நினைத்தால் முடிவதில்லை.
கைக் கழுவி பார்த்து விடு
அது உன்னை நினைப்பதில்லை!