அப்பாவின் உயிரே நான் தான்
அப்பாவின்
உயிரே நான் தான்...
முதல் நாள் பள்ளி
சேர்க்கையின் போதும்
முகூர்தத்தின் போதும்
அவர் உடலின் நடுக்கம்
உணர்ந்தேன்
ஆண்டுகள் உருண்டது..
கணவனே என் உலகம்
அவன் உலகத்திலோ...
நெரிசலில் நான்.
ஆண்டுகள் உருண்டது..
உறங்கும் வேளை
உதட்டை சுழித்து
சிரிக்கும் பிள்ளையின்
கனவில் நானே என்று
கனவில் மிதக்கும் நான்...
பிள்ளைக்காகவே
நான்...
ஆண்டுகள் உருண்டது..
அம்மா பாவம்ப்பா
அன்பா சொல்லுங்க
திட்டாதீங்க...
அப்பாவிடம்
விண்ணப்பம்....
ஆண்டுகள் உருண்டது....
மருமகளும், நானும்
ஒரே வீட்டில்...
எங்கள் மனசோ
முள்ளின் பார்வை வேண்டி
தராசின்
எதிரெதிர் தட்டில்....
ஆண்டுகள் உருண்டது..
அப்பாவின் செல்லமாமே நீ
அவளை பிடித்து
அரவணைத்துக் கொஞ்ச
போங்க பாட்டி
பெருமையுடன்
பிடி விலக்கி...
பழைய சக்கரம் ஒன்றை
ஓட்டிச் சென்றாள் பேத்தி....
சிரித்துக் கொண்டேன்
சக்கரம்
உருள்வதைப் பார்த்து....
