கடந்து செல்கிறது காலம்
கையசைக்கிறாய்...
விடை பெறுகிறேன் ...
பிரிவில் தொடங்குகிறது பிரியம்.
***************************************************************
வலிதான்....
என்றாலும் வண்ணத்து பூச்சியாகிவிடுகிறது
புழு.
******************************************************************
சிதறிய தானியங்கள்...
காத்திருக்கிறது
வலை.
******************************************************************
பூ உதிர்கிறது...
மழையாகலாம்
மரத்தின் கண்ணீர்.
*****************************************************************
என் மொழி தெரியவில்லை...
கடித்துக் கூப்பிடுகிறது
எறும்பு.
*****************************************************************
குயில் தொலைத்த குரல்
நேற்று கிடைத்தது
குழந்தையும் பொம்மையும் பேசிய போது.
******************************************************************
வாசல் வரைதான் நாய்.
நன்றியின் எல்லை
அதுவாய் இருக்கக் கூடும்.
****************************************************************
சமையலறையில்
நடமாடிக் கொண்டிருந்தது
அம்மா பாத்திரம்.
****************************************************************
யாரும் இல்லை
திரும்பிப் பார்க்கிறேன்...
கடந்து செல்கிறது காலம்.
******************************************************************
