முயற்சியின் முடிவில்
அது நடந்திருக்கக் கூடாதுதான்
ஆனால் நடந்துவிட்டது...
தொடரும் முயற்சிகள் எல்லாமே
தோல்வியின் பிடியில்...
அப்படியிருந்தும் துவளவில்லை
முயற்சிகளின் எண்ணிக்கை
கூடிக்கொண்டேதான் இருந்தது...
இருப்பினும் மனதில் மட்டும்
அது நடந்திருக்க கூடாதென்ற
எண்ணம் வட்டமிட்டுக்
கொண்டுதானிருந்தது...
மீண்டும் மீண்டும் எகிறினாலும்
ஏனோ எட்டமுடியவில்லை...
மற்றவர்களின் கிண்டல்களை
மனதுக்குள் செல்ல விடவில்லை
முயற்சியின் வேகம்...
'முயன்றால் முடியும்...' என்ற
தாயின் கூவல் இன்னும்
உத்வேகத்தைக் கொடுத்தது...
முயற்சிகள் எல்லாம்
முடிவில் பூஜ்ஜியமாய்...
விடாது தொடரும்
முயற்சிக்கு இறுதியில்
வெற்றி கிடைக்கலாம்...
எதிர்மறையாகும் போது
பரிதவிக்கும் தாயின் கரம்
எளிதாக தூக்கியும் விடலாம்...
எது எப்படியோ...
வீழும் போதெல்லாம்
விரிக்கும் சிறகுகளில்
விண்ணைத் தொடும் வேகம்...
வெற்றியைச் சுவைக்கும்
வேகத்தில் சிறகை விரித்தது
தவறுதலாய் குழிக்குள்
விழுந்த கோழிக்குஞ்சு..!
-'பரிவை' சே.குமார்
