கோணல் கோடுகள்

௦௦௦இந்தியநாடு என்நாடு
இங்கு
ஏழையர் வாழ்வது பெரும்பாடு

புள்ளிகள் சேர்வது சிறுகோடு
எல்லையை பிரிப்பது ஒருகோடு

புள்ளிகளில்லாப் புதுமைக் கோடு
எல்லையை மீறிய வறுமைக் கோடு

வறுமைக் கோட்டுக்குக் கீழேயும்
வாழ்கின்ற மக்கள் பலகோடி
இந்த
செம்மறியாட்டு கூட்டங்களே
சனநாயகத்தின் உயிர்நாடி

அந்நிய நாட்டுக்கீடாக
இந்திய நாட்டை முன்னேற்ற
மேடையில் முழங்கும் சம்பவங்கள்
இவை
கானல்வெளியின் நீர்த்தடங்கள்

போடும் திட்டம் பலவாகும்
அதில்
புகையும் தொழில்கள் சிலவாகும்
நலியும் தொழிலை நசுக்குதற்கு
நாளொரு திட்டம் உருவாகும்

லஞ்ச ஊழல் லாவண்யம்
வேலை இல்லாத்திண்டாட்டம்
பஞ்சம் வளர்க்கும் பரிதாபம்
பதவி கிடைத்தால் தனலாபம்

கொலை கொள்ளை
வெட்டுக் குத்து
வாயை திறந்தால்
வன்முறைக் காற்று

நலிந்த நாட்டை முன்னேற்ற
நாளை நடப்பதை சிந்தித்தால்..,

அரசியல் கட்சிகள்
அவசரக் கூட்டம்
ஒருநாள் சேர்ந்து
போட்டிடும் திட்டம்

சாதிமத ஆயுதம் ஏந்தி
உள்நாட்டு சண்டையை உருவாக்கி
உயிரைக் குடித்திடும்
உயரியத் திட்டம்

மக்கள் தொகையும் குறையட்டும்
மாண்டவர் வறுமை தொலையட்டும்
இருப்பவர் வயிறு எரியட்டும்
ஏய்ப்பவர் வாழ்வு உயரட்டும்

இந்திய நாடு என்நாடு
இங்கு
ஏழையர் வாழ்வது பெரும்பாடு

சமதர்ம சமுதாயம் நம்நாடு
இங்கு
சமத்துவம் என்பது மண்ணோடு!