ஏனமேந்தும் வாழ்வு
என்றுமென் நெஞ்சில் ஏக்கம் பெருகி வழிகிறது
ஏழ்மை நிலைதான் ஏனென்று கதறியே கழிகிறது !
எந்நாளும் இந்நிலை எள்ளளவும் இல்லா நிலை
ஏட்சியும் ஆகாதா ஏழையரின் வாழ்வில் மாற்றம் !
என்றாவது ஒருநாள் ஏற்றம் பெறுவர் ஏழைகளும்
ஏக்கமிலா வாழ்வுடன் ஏகாந்தம் நிலவும் சூழலும்
எல்லையிலா இன்பம் எங்கும் பரந்து நிலைக்குமென
ஏகபோகம் விளையுது என்னுள் எழுகின்ற வேட்கை !
எதுகைமோனை கவிதை எழுதி ஏழைக்குப் பயனில்லை
ஏனமேந்தும் மனிதரை எதிரிகளாய் நான் கருதவில்லை
எண்ணக்கரு அதுவே எனக்கென்று எழுதிட வரவில்லை
ஏழைபாழை ஏற்றம்பெற என்றுமே நாம் முயலவில்லை !
எத்தனித்தால் நிச்சயம் எதற்கும் வழியொன்று பிறக்கும்
ஏகோபித்த நிலையால் ஏழ்மையை விரட்டவும் முடியும்
எதிர்மறை கருத்தின்றி எடுக்கின்ற முடிவால் விடிந்திடும்
ஏழைகளே இல்லா எதிர்பார்ப்பும் நிறைவேறும் நிச்சயம் !
எட்டாக்கனி அல்ல எளியோர் வாழ்வும் வளம்பெற
ஏமாற்றி வாழும் எவரெவரோ பீடுநடை போடுகிறார்
என்றுமே இங்கு ஏமாளி ஒன்றுமிலா ஏழைகள்தான்
ஏற்றிடுக சூளுரை ஏழ்மையை அறவே அழிப்போம் !
( ஏனம் = பாத்திரம் )
( ஏட்சி = உதயம் )
பழனி குமார்
