தமிழ்ப் புத்தாண்டு
அனைவருக்கும் இனிய #தமிழ்ப்_புத்தாண்டு நல்வாழ்த்துகள்.
கருமை வானம் வெளுத்தது - அதில்
. கதிரின் ஜோதி துளிர்த்தது
வரமாய் ஆண்டும் மலர்ந்தது - இது
. வரத்தான் காலை புலர்ந்தது !
இன்னல் எல்லாம் இடிந்தது - நம்
. இருளும் நீங்கி விடிந்தது
மின்னல் கைக்குள் அடைந்தது - தீ
. மிடிமை எல்லாம் உடைந்தது !
உழவர் பெருமை உயர்ந்தது - அவர்
. உணர்ச்சி வானைப் பிளந்தது !
அழகே எங்கும் அமைந்தது ! - மதி
. அதுவாய் விரிந்து வளர்ந்தது !
ஞானம் கல்வி நிலைத்தது - இதை
. ஞாலம் கண்டே மலைத்தது
மானம் வீரம் புரிந்தது - நம்
. மரியா தைகள் தெரிந்தது !
இனிமேல் வசந்தம் பக்கத்தில் - நம்
. இடர்கள் ஓடும் வெட்கத்தில் !
கனிந்த இந்தப் புத்தாண்டில் - நம்
. கடமை செய்வோம் ! வாழ்வோமே !
-விவேக்பாரதி
