கண்களை திற

கண்களை திற! வழி தெரியும்
கால்கொண்டு நட! தடம் பதியும்
நூல்பல படை! பேர் நிலைக்கும்
நுண்மதி அடை! சீர் பெருகும்

விதையினை விதை! விருட்சம் வரும்
வியர்வையை வடி! விடியல் வரும்
மூத்தோர் மதி! பழி விலகும்
மூடத்தை எரி! மதி வளரும்

தடைகளை உடை! தலை நிமிரும்
தன்னலம் விடு! ஊர் புகழும்
புன்னகை புரி! சினம் விலகும்
புதுமையை தரி! மனம் மகிழும்

அன்பினை கொடு! இன்பம் தரும்
ஆசைகள் விடு! அமைதி வரும்
பாசத்தைப் பகிர்! உறவு வரும்
பணிவினில் நட! பதவி வரும்

உழைப்பதை உண்! உளம் மகிழும்
உண்மையை சொல்! ஊர் மதிக்கும்
உயர்வினில் பணி! உலகு தொழும்
உள்ளதை கொடு! புகழ் விளங்கும்

சொன்னதை செய்! சுற்றம் வரும்
சொந்தத்தை மதி! சுமை குறையும்
நீதியில் நட! நிலை உயரும்
நித்திரை செய்! நோய் குறையும்

கடவுளைத் தொழு! குறை விலகும்
கவலையை விடு! களி பிறக்கும்
மங்கையை மதி! குடி உயரும்
மறைவழி நட! குலம் வளரும்

அச்சத்தை விடு! ஆண்மை வரும்
ஆற்றலை பெறு! வீரம் வரும்
அரசியல் அறி! ஆட்சி வரும்
அதர்மம் விடு! அறம் பெருகும்.

பாவலர். பாஸ்கரன்