நான் செருப்பு
நான் செருப்பு
கடித்திட எனக்கு பல்லை வைத்து
கட்டியே உன்னிடம் கொடுத்தாரா?
அடித் தடுமாறி விழுந்திட நடந்து
அதற்கும் நான் தான் காரணமா?
அடிக்கும் வெயிலில் நடந்தவன் நானே!
ஆயினும் அகத்தின் வெளியே நான்?
அடித்திட ஆயிரம் பொருட்கள் இருந்தும்
அடியேன் ஒருவனே இளக்காரம்!
நொடிந்தால் கூட ஓய்வெனக்கில்லை
நுழைத்து லாரியில்
தொங்க வைப்பார்!!
படியின்மடியில் இருக்கும் என்னை
பட்டி நாயும் குதறிடுமே !
அடியேன் உரிமையாளரும் மாறுவர்
ஆலய, திருமண மண்டபத்தில்!
தடிமனாயிருப்பினும் பொதியெனச்
சுமப்பேன்
தரணியில் மதிப்பார் எவரிங்கே?
